23 лютага - Дзень абаронцаў Айчыны і Узброеных сіл Рэспублікі Беларусь

А.Лукашэнка: Гарантам абароны краіны ад патэнцыяльнага агрэсара з"яўляюцца сучасныя Узброеныя сілы, а таксама іншыя войскі і воінскія фарміраванні.
Беларусь сёння адзначае Дзень абаронцаў Айчыны і Узброеных Сіл. Першапачаткова 23 лютага было святам Краснай Арміі ў гонар перамогі над нямецкімі войскамі ў 1918 годзе. Зараз гэты дзень сімвалізуе патрыятызм і вернасць воінскаму абавязку. Са святам салдат, сяржантаў, прапаршчыкаў, афіцэраў, а таксама ветэранаў павіншаваў Прэзідэнт Аляксандр Лукашэнка.
"У цяперашнім становішчы глабальнай нестабільнасці Беларусь паказвае прыклад паслядоўнай міралюбнай палітыкі пры няўхільнай рашучасці ў адстойванні сваіх нацыянальных інтарэсаў. Гарантам абароны краіны ад патэнцыяльнага агрэсара з"яўляюцца сучасныя Узброеныя сілы, а таксама іншыя войскі і воінскія фарміраванні", - гаворыцца ў віншаванні.
Сёння па ўсёй краіне пройдуць памятныя мерапрыемствы. Вянкі ўскладуць да манумента Перамогі, хвілінай маўчання беларусы ўшануюць памяць загінуўшых абаронцаў Айчыны.